भिडियो कलका लागि गुगलको नयाँ एप

अघिल्लो हप्ता गुगलले 'डुओ' नामक भिडियो कलिङ एप् सार्वजनिक गरेको छ ।

च्याट, मेसेन्जरहरुका बिचमा फेरि अर्को एक मेजेन्जर थपिए झैँ लागे पनि, 'डुओ' भिडियो कलको लागि मात्र बनाइएको एप हो । अत्यन्तै साधारण 'इन्टरफेस' भएको गुगलको 'डुओ' एन्ड्रोइड प्रयोगकर्ताहरुको लागि नौलो किसिमको भिडियो कलिङ एप हो। आइफोन प्रयोगकर्ताहरुले आपसमा कुरा गर्न 'फेसटाइम' प्रयोग गर्दै आइरहेकाले, यो खासै नयाँ नहुन सक्छ तर आइफोन र एन्ड्रोइड फोन प्रयोगकर्ताहरुले एकआपसमा 'डुओ' प्रयोग गर्न सक्ने कारण, यो फेसटाइम भन्दा फरक छ ।

भाइबर जस्तै, डुओ चलाउनको लागि पनि मोबाइल नम्बरबाट रजिष्ट्रर गर्नुपर्ने हुन्छ, यसअघिका गुगलका एपहरुमा जिमेलबाट साइन इन गर्नुपर्ने बाध्यता थियो। फोनमा भएका कन्ट्याक्टबाट डुओ राखिएका व्यक्तिहरु देख्न सकिन्छ । डुओ एपमा, भिडियो कल गर्न मात्रै मिल्छ, फोन आउँदा आउँदै कसले फोन गर्यो, कस्तो अवस्थामा छ, कल नउठाइ देख्न सकिन्छ ।

गुगल ब्लगका अनुसार 'डुओ' छिटो र भरपर्दो छ । अन्य एपहरुमा भिडियो कल गर्दा, कनेक्टिङ वा डायलिङ भनेर केही समय लागिरहेको हुन्छ तर डुओमा भिडियो कल छिटो कनेक्ट हुन्छ, स्लो नेटवर्कमा पनि राम्रोसँग काम गर्छ । प्रयोगकर्ताको नेटवर्कको स्थिति हेरेर गुगलले भिडियो र अडियोको गुणस्तर स्वचालित रुपमा परिवर्तन गर्छ। अर्को कुरा चाँहि, यदि म घरमा वाइफाइ नेटवर्कमा छु र घरबाट निस्कने बित्तिकै मोबाइल डाटामा कनेक्ट हुन्छु भने, डुओमा जारी रहेको कल, जारी नै रहन्छ, कट्दैन । भन्नको मतलब नेटवर्क परिवर्तन हुँदा पनि, फोन कट्दैन । 'डुओ'मा भिडियो कल गर्ने हैन त?

डुओ एन्ड्रोइड र आइओएस दुवैमा उपलब्ध छ।