मोबाइलबाट म्युजिक भिडियो

फोटो खिच्न महंगो क्यामेरा होइन, 'कन्सेप्ट'को जरुरी पर्छ । मोबाइल फोनबाटै खिचिएका फोटोहरुले पनि बेला - बेलामा तहल्का मच्चाउने गरेकाछन् । आज यस ब्लगमा भने, मोबाइलबाट सम्भवत पहिलो नेपाली म्युजिक भिडियो खिचिएको चर्चा गरिँदैछ।

२०१२ को सेप्टेम्बरमा ठूलो तामझामका साथ, नोकियाले "लुमिया ९२०" विन्डोज फोन सार्वजनिक गर्यो । नोकियाले लुमिया ९२० को ८ मेगापिक्सल क्यामेरालाई 'प्योर भ्यु'को विशेषण दिएर, आफ्नो क्यामेरा उत्कृष्ट भएको बताएको थियो। फोन सार्वजनिक गर्ने क्रममा, नोकिया लुमिया ९२० बाट खिचिएको भिडियो भन्दै केही भिडियोहरु पनि देखाइएको थियो, तर पछि थाहा भयो, ती भिडियोहरु मोबाइलबाट खिचिएका थिएनन् । नोकियाको कर्तुतको आलोचना हुनथालेपछि, नोकियाले आफ्नो ब्लग मार्फत माफी नै माग्नुपर्यो ।

माथि नोकियाको प्रसंगले थाहा हुन्छ, ३ वर्ष अघिसम्म मात्रै पनि व्यवसायिक भिडियो खिच्नका लागि मोबाइलहरु उपयुक्त थिएनन् । तर विगत ३ वर्षमा आइफोन, एन्ड्रोइड तथा विन्डोज फोनका सफ्टवेयर र हार्डवेयरमा ठूलै परिवर्तन भइसकेकोछ । अब स्मार्टफोनबाट भिडियो खिच्नु, बनाउनु ठूलो कुरो रहेन, दिनहुँ आन्दोलनका र झडपका भिडियोहरु फेसबुकमा हिजोआज अपलोड हुने गरेकाछन् । तर व्यवसायिक रुपमै भिडियो बनाउनु भने अझै चुनौती नै रहेकोछ । यही चुनौतीको बिचमा बिजी ब्रम्हा समूहले प्रयोगको रुपमा, एउटा नेपाली म्युजिक भिडियो सार्वजनिक गरेकोछ ।

किरण खरेलको रचना, शिव शंकरको संगित, ब्रजेशको स्वर रहेको "तिम्रो माया" गितको भिडियो बिजी ब्रम्हा समूहले मोबाइलबाट खिचेर निर्माण गरेको हो । सन् ९० को दशकमा रेकर्ड गरिएको ब्रजेशको यो गितमा अभया सुब्बाले पनि साथ दिएकीछिन्, यसका ओरिजिनल गायक भने धुर्व केसी हुन् । यो म्युजिक भिडियो सँगै, निर्देशन क्षेत्रमा हात हालेका सोमेश वर्माका अनुसार, नेपालमा मोबाइलबाट खिचिएको यो सम्भवत पहिलो नेपाली म्युजिक भिडियो हो ।

मोबाइलबाट खिचिएको भएपनि, क्वालिटी हेर्दा कुनै मुभी क्यामेराले खिचेको भान हुन्छ । युट्युबमा यो म्युजिक भिडियो हेर्दै गर्दा लाग्यो, सट् राम्रो हुने हो, कन्सेप्ट राम्रो हुने हो भने, मोबाइलबाटै व्यवसायिक भिडियो पनि बनाउन सकिने रहेछ । असस्‌ कम्पनीको मोबाइलबाट भिडियो एकदिनमा खिचिएको हो । बिजी ब्रम्हाको यो प्रयोग पछि, अरुले पनि यसलाई पच्छ्याउलान् कि? तपाई पनि तलको भिडियो हेर्नुहोस्, मोबाइलबाट खिचिएको भिडियो कस्तो लाग्यो?

➤ आकारपोष्ट एन्ड्रोइड एप् डाउनलोड गर्नुस्