गुगल रिडरका ३ विकल्पहरु

सन् २००५ देखि सञ्चालनमा रहेको गुगल रिडर आउँदो जुलाई १, २०१३ देखि बन्द हुने भएकोछ । पछिल्लो वर्षहरुमा गुगल रिडरको प्रयोग घटेको बताउँदै सर्च जायन्ट गुगलले केहि दिन अघि रिडर बन्द गर्ने घोषणा गरेसँगै इन्टरनेटमा गुगलको घोषणाको विरोधमा आवाजहरु उठिरहेकाछन् । केही साइटहरुले गुगल रिडर बन्द गर्ने गुगलको घोषणाको विरोधमा हस्ताक्षर अभियान नै सञ्चालन गरेकाछन् । डिग, जाइट जस्ता सोसल बुकमार्किङ साइटले गुगल रिडर जस्तै रिडर चाँडै निर्माण गर्नेभएकाछन् भने केही साइटहरुले यो समयलाई आफ्नो रिडरको मार्केटिङमा प्रयोग गरिरहेकाछन् ।

गुगलको घोषणा सँगै रिडरका प्रयोगकर्ताहरु रिडरको विकल्प खोज्न थालेकाछन् । अष्ट्रेलियाबाट एकजना अपरिचित साथी मुरुजीले फोन गरेर गुगल रिडरको विकल्पका बारेमा बुझ्न खोजेपछि यो ब्लग नलेखिरहन सकिन ।
१) द ओल्ड रिडर
द ओल्ड रिडरललाई गुगल रिडर नै भन्दा फरक पर्दैन । ओल्ड रिडरमा साइन इन गरेर आफूलाई मन परेका साइटहरुको फिड राखेर अनलाइनमा पढ्न मिल्छ । गुगल रिडरबाट डाउनलोड गरेको फिडलाई सिधै ओल्ड रिडरमा इम्पोर्ट पनि गर्न सकिन्छ । ओल्ड रिडरलाई गुगल रिडरको उत्तम विकल्पको रुपमा मान्न सकिन्छ ।

२) फिड्ली
फिड्ली RSS रिडर हो । Android र iOS डिभाइसमा फिड्ली एप मार्फत तथा क्रोम, फायरफक्स तथा सफारी ब्राउजरमा एक्सटेन्सन मार्फत फिड्ली चलाउन सकिन्छ । गुगल रिडर बन्द हुन्छ भन्ने थाहा थियो भन्दै फिड्लीले आफ्नो ब्लगमा गुगल रिडरका फिडहरुलाई फिड्लीमा सार्न मिल्ने कुरा उल्लेख गरेकोछ ।

३) फिड रिडर
फिड रिडरलाई पनि गुगल रिडरको विकल्पको रुपमा लिन सकिन्छ ।

आफ्ना कुरा
गुगलले भने झैँ, सोसल नेटवर्कहरु तथा मोबाइल एप्सहरुका कारण गुगल रिडरको प्रयोगमा पछिल्ला वर्षहरुमा कमि आएको छ ! केही वर्ष पहिले ग्लोबल थट्ज (हाल बजम) मा लेख्न थाल्दा, मलाई टेक्नोलोजी समाचारहरु पढ्न कुन माध्यम ठिकहोला भनेर खुबै सोचेको थिँए । सबै साइटहरुमा सँधै जान गाह्रो थियो, अनि आरएसएसलाई गुगल रिडरमा तानेर पढ्न पनि खासै मन लागेन । अनि मैले ट्विटरलाई विकल्पको रुपमा रोजेको थिँए ।
आफुलाई मन परेको जति साइटलाई ट्विटरमा त्यसबेला देखि फलो गर्न थालेँ, अनि उनीहरुको ट्विटको लिंक पच्छ्याउँदै पढ्न थालेँ र यो क्रम अहिले पनि जारी छ । त्यसबेला नेपाली साइटहरुको ट्विटर एकाउन्ट नभएका कारण सबै साइटका समाचारहरु एकै ठाउँमा ल्याउने प्रयोजनले @NewsBlogsNepal नामक ट्विटर एकाउन्ट पनि सुरु गरे । अत: आज पनि ट्विटर मेरो लागि प्रमुख समाचारको स्रोत हो । ट्विटर बाहेक, मोबाइलमा गुगल करेन्टस् र पकेट प्रयोग गर्ने भएका कारण गुगल रिडरको अवसान हुँदा पनि मलाई व्यक्तिगत रुपमा कुनै वाधा चैँ नपर्ने रहेछ ।यदि एन्ड्रोइड वा आइओस डिभाइस चलाउनुहुन्छ भने, तपाईहरुको लागि पनि गुगल करेन्ट्स उत्तम विकल्प हुनसक्छ । आफूलाई मन परेका साइटहरुलाई गुगल करेन्ट्समा अफलाइनमा पनि पढ्न सकिन्छ । यो ब्लग “आकार पोष्ट” पनि गुगल करेन्ट्समा उपलब्ध छ ।

a) Google Currents for Android 
b) Google Currents for iOS
c) Subscribe Aakar Post in Google Currents
(पहिलो तस्बिर द रिडर चलचित्रबाट लिइएको हो)