काठमाडौँ विश्वविद्यालयमा बन्द माथि अर्को बन्द, परिस्थिति झनै जटिल #ku #strike #shutdown

आज आठौँ दिन पनि केयु बन्द

गत साता सम्पन्न विद्यार्थी कल्याणकारिणी परिषद को निर्वाचन पछि काठमाडौँ विश्वविद्यालय मा गरिएको तालावन्दी १ साता बितिसक्दा पनि खुल्न सकेको छैन । माओवादी समर्थित विद्यार्थी संगठन अखिल क्रान्तिकारी ले निर्वाचन खारेजी सहित विभिन्न माग राखी गत बुधबार देखि केयु मा अनिश्चितकालिन तालाबन्दी गरेको थियो । अनि बन्द खुलाउन, माथिल्लो तह मा केयु ले वार्ता गरेको गाँइगुँइ हल्ला चलेको थियो ।

बन्द खुलाउने प्रयास स्वरुप, केयु ले हिजो २४ गते एक सूचना जारी गर्दै निर्वाचन स्थगन को घोषणा गरेसँगै क्रान्तिकारी ले आज बाट बन्द फिर्ता लिने जनाएको छ । तर केयु ले निर्वाचन स्थगन को घोषणा गरेसँगै, विद्यार्थी कल्याणकारिणी परिषद का निर्वाचित पदाधिकारीहरुले, निर्वाचन स्थगन को घोषणा केयु ले तत्काल फिर्ता नलिए, आन्दोलन मा उत्रने चेतावनी दिँदै, हिजै देखि केयु मा थप ताला लगाइदिएका छन् । केयु अब पढ्ने हैन,  पार्टि राजनिति गरेर आफ्नो स्वार्थ पुरा गर्ने स्थान को रुप मा विकसित हुँदैछ ।

फागुन २४ गते रजिष्ट्रार प्रा. डा. भद्रमान तुलाधर व्दारा जारी सूचनामा, “१७ गते सम्पन्न भएको निर्वाचन प्रकृया तत्काललाई स्थगन गर्दै र विद्यार्थी प्रतिनिधि सहितको छानविन समिति गठन गरि अवरुद्ध परिस्थितिलाई निकास दिन पहल गरिएको” भनेर लेखिएको छ । तर अखिल क्रान्तिकारी ले गरेको बन्द टार्नलाई केयु प्रशासन ले लिएको निर्णय सार्वजनिक भए लगत्तै, अस्ति को निर्वाचन का निर्वाचित पदाधिकारीहरुले, “केयु ले आधारहिन, एकपक्षिय निर्णय लिएको” भन्दै, केयु को उक्त निर्णय को भत्सर्ना गरेका छन्  । साथै, उक्त निर्णय तत्काल फिर्ता लिन चेतावनी दिएकाछन् अन्यथा जुनसुकै मुल्य चुकाउन पछि नपर्ने उनीहरुले जनाएकाछन् ।

निर्वाचित विद्यार्थी कल्याणकारिणी परिषद का पदाधिकारीहरु ले हस्ताक्षर सहित जारी गरेको विज्ञप्ति मा, “समस्या समाधानको नाममा गरिएको पक्षपाती निर्णय तुरुन्त वदर गरी निर्वाचन परिणामलाई कार्यान्वयन गर्न जोडदार अपिल गर्दछौँ भनिएको छ” । विज्ञप्तिमा केयु ले उक्त ‘पक्षपाती निर्णय’ फिर्ता नलिए, “सम्पुर्ण विद्यार्थीहरु, नियम र विधान को कार्यान्वयन गर्न, गराउन जस्तोसुकै मुल्य चुकाउन पछि नपर्ने” कुरा उल्लेख गरिएको छ ।

अब केयु कहिले खूल्ला यसै भन्न सकिने स्थिति छैन । त्यतिमात्र होइन, केयु मा विद्यार्थीहरु बिच झडप को श्रृंखला पनि सुरु हुन सक्ने कुरालाई नकार्न सकिँदैन । शनिबार निकालेको सूचना मा निर्वाचन ठिक छ भन्ने केयु प्रशासन ले हिजो अर्को सूचना निकालेर ‘निर्वाचन स्थगन’ भएको घोषणा गर्नु आफैँ मा दोधारे चरित्र प्रदर्शित भएकोछ । “पहिले निर्वाचनलाई सही देख्ने र पछि समस्या समाधान को निहुँ मा सोच्दै नसोची, केही व्यक्तिहरुको भरमा निर्वाचन स्थगन को घोषणा गर्नु आफैँ मा लज्जाजनक छ” – एक निर्वाचित विद्यार्थी कल्याणकारिणी परिषद पदाधिकारी ले भने  ।

आफू अन्तिम वर्ष को विद्यार्थी, परीक्षा आउन महिना दिन मात्रै बाँकी थियो, तर अब ‘केयु’ कहिले खूल्ने नै ठेगान छैन भने, हाम्रो परीक्षा कहिले हुन्छ, यसै भन्न मुस्किल छ । ‘क्यालेन्डर कहिले बिग्रेको छैन’ भनेर मख्ख पर्ने केयु प्रशासन ले यस प्रकार को निर्वाचन स्थगन को निर्णय गर्दा सबै सरोकार पक्ष सँग वार्ता गरेको भए अर्को समस्या श्रृजना हुँदैन थियो भन्ने हाम्रो बुझाइ छ ।

केयुलाई दलगत स्वार्थको लागि यसरी नै बन्द र हडताल को भुमरी मा फसाउँदै लाने हो भने, ‘केयु’ केही महिना मै ‘टियु र पियु’ मा परिणत हुने पक्का छ । विद्यार्थीलाई उक्साएर र विद्यार्थी को काँध मा टेकेर राजनितिक पार्टिहरुले केयुमा राजनिति गर्नु अत्यन्त खेदजनक र लज्जाजनक कुरा हो । देश को राम्रो मानिएको विश्वविद्यालय मा पनि बन्द र हड्ताल हुनु तथा राजनितिक अखडामा परिवर्तन हुनु अत्यन्त लज्जास्पद छ । जे हुनु भइसकेको छ, अनि केयु को निर्णय निर्वाचित पदाधिकारीहरुले पनि नमान्ने लगभग निश्चित नै छ, कारण निर्वाचन फेरि भएका राजनितिक चलखेल झनै बढ्ने उनीहरुको बुझाइ छ । समाधान के हुनसक्छ यसै भन्न मुश्किल छ ।

मलाई लाग्छ केयु मा कुनै पनि किसिम  का निर्वाचन गराइनु हुँदैन । निर्वाचन गराउनु भनेको, पार्टिगत राजनिति नै विश्वविद्यालय मा छिर्नु हो भन्ने मेरो ठहर छ । स्मरणीय रहोस यस प्रकार को निर्वाचन ४-५ वर्ष पहिले बाट मात्र सुरु भएको हो । विद्यार्थीलाई प्रजातान्त्रिक अभ्यास गर्न दिइँदा, केयु मा राजनितिक चलखेल बढेकोले, त्यस प्रकार का निर्वाचनहरु रोक्नै पर्ने आवश्यकता देखिएको छ । ४-५ वर्ष अघिसम्म निर्वाचन नगर्दा पनि केयु चलेकोथ्यो भने, अहिले पनि निर्वाचन नगर्दा केयु चल्नसक्छ  भन्ने मान्यता बाट केयु अघि बढे हुन्छ । निर्वाचन को व्यवस्था नभएपछि, पार्टिगत राजनिति विश्वविद्यालय मा छिर्न सक्दैन भन्ने हाम्रो बुझाइ छ । यस्तै बन्द हडताल हुने, पार्टिगत राजनिति हुने भएपछि बेक्कार मा के र कसका लागि चाहियो निर्वाचन ? विश्वविद्यालय भनेको शिक्षा आर्जन गर्ने ठाउँ हो, कुनै पार्टिगत राजनिति गर्ने ठाउँ होइन । केयु ले त निर्वाचन स्थगन को सूचना निकालेछ, म त भन्छु केयु ले सम्पूर्ण निर्वाचन को प्रक्रिया नै खारेज गरे हुन्छ ।

तेस्रो बाहेक सबै तस्विरहरु : आमिर जोशी