धैर्यता

तिमीले
निचोर्दै, चिथोर्दै
खियाउन लाग्दा
म कहिले आत्तिन्न ।

तिमी सँग शक्ति होला
म सँग सामर्थ्य छ
तिमी सँग क्रोध होला
म सँग सहनशिलता छ
तिमी सँग बुद्धि होला
म सँग विवेक पनि छ !

त्यसैले
तिमी र म
वा
म र तिमी
जताबाट हेरौँ
फरक स्पष्ट छ ।

तिमी पेल्न खोज्छौ
म ढुंगा बन्छु
तिमी उखेल्न खोज्छौ
म अनन्त जरा गाड्छु
तिमी धकेल्न खोज्छौ
म हिमाल बन्छु
तिमी पखाल्न खोज्छौ
म अझै चम्किन्छु
अनि
तिमी थाक्दछौ
किनकी म
विर गाथा बोकेको
गोर्खाली हुँ ।

सुस्ताहरु मा तिमी
रजाँइ गर्न थाल्छौ
अनि
कालापानीहरुमा
मलाई लाग्छ
निभ्न लागेको दियो
चम्के झैँ,
मात्र त्यस्तै ।

तिमी कसैको अधीनमा रहँदा
मैले कसै सामु शिर
झुकाइन,
कसैसामु घुँडा टेकिन
र
पिठ्युँ पनि आफ्नै
धर्ति सामुन्ने नै थियो ।
तर पनि
तिमी मलाई लाछी ठान्छौ,
तिमी सँग क्रोध छ
म सँग सहनशिलता छ,
तिमी सँग बुद्धि छ
तर
म सँग विवेक पनि छ !

imgsrc:travel-nepal.com

-घिमिरे सुनिल